PASEOS MATEMÁTICOS POR OLEIROS: PARQUE JOSÉ MARTÍ
Desta vez volvemos a un parque para facer un dos nosos paseos matemáticos.
O parque José Martí, situado en Santa Cristina, foi inaugurado en 1991 co nome deste poeta e político cubano. A planta deste parque é bastante irregular, e non nos imos deter moito nas formas xeométricas, a pesar dese gran círculo rodeado de palmeiras e cunha fonte no centro.
Unha curiosidade que podemos atopar no parque é un mapa do concello formado por sebes en que aparecen as nove parroquias que o conforman, cada unha plantada con flores diferentes.
E este mapa permite falar dun resultado matemático, que é o teorema das catro cores. A grandes trazos o teorema di que un mapa plano pode colorarse con só catro cores coa condición de que dúas rexións con fronteira común non compartan a mesma cor.
É un problema que naceu no século XIX e foi formulado formalmente por Arthur Cayley en 1878. Ao longo dos anos foron aparecendo demostracións que confirmaban o resultado mais finalmente acababan parecendo erros nelas. Non foi ata 1976 que Kenneth Appel e Wolfgang Haken conseguiron comprobar que o resultado era correcto cunha demostración que incluía moito traballo con ordenadores.
E que pasa co mapa de Oleiros? Pois que en realidade é moi sinxelo e non só podemos pintalo con catro cores, senón que con só tres tamén sería posible:
Claro que converter este mapa en xardín con máis cores fai que resulte máis vistoso...
Localización: 43º 2' 1" N - 8º 2' 16" W
Para saber máis:
https://www.youtube.com/watch?v=_emzYnJRdZM (Vídeo en YouTube)
https://www.turismoleiros.org/gl/que-ver/parques (Parques de Oleiros)
https://www.gaussianos.com/el-teorema-de-los-cuatro-colores-la-teoria-de-grafos-al-servicio-del-coloreado-de-mapas/ (Teorema das catro cores en gaussianos)
Comentarios
Publicar un comentario