PASEOS MATEMÁTICOS POR OLEIROS: CASA CHARRY
Desde finais do século XIX, Oleiros converteuse nun lugar que a burguesía coruñesa considerou ideal para establecer unha segunda residencia e por iso podes ver moitas casas e vilas deses anos. Unha delas é a Casa Charry, situada xunto ao concello de Oleiros.
A Casa Charry é un edificio construído contra 1912 que foi reformado para o seu uso como equipamento cultural. Foi deseñado con influencia francesa e toques modernistas. O modernismo ou art nouveau é un estilo decorativo que se desenvolveu a finais do século XIX e principios do XX e que se distinguiu especialmente pola inspiración na natureza e o uso de liñas curvas e materiais como o aceiro e o cristal.
De fronte á entrada da casa podemos ver que non é simétrica como se ve no rectángulo vermello da imaxe. A parte superior é unha curva. Analízandoa, vemos que é unha circunferencia que ten o seu centro no balcón da parte superior.
Posiblemente os elementos que máis destacan son as decoracións modernistas, que podemos ver como frisos. En matemáticas, un friso é un recubrimento dunha rexión do plano entre dúas rectas paralelas. Pode estudarse como a aplicación de dous movementos sobre unha figura básica. Estes movementos poden ser simetrías, xiros de 180 ° e translacións e existen só sete tipos diferentes de frisos.
Os frisos que vemos na Casa Charry son todos do mesmo tipo. Podemos velo nalgún dos balcóns: á figura marcada en cor marrón realízaselle unha simetría seguindo un eixe vertical (figura verde). A continuación aplícase unha translación para repetir sucesivamente a decoración (figura rosa).
Se nos fixamos noutros elementos decorativos podemos ver como se utiliza o mesmo tipo de frisos.
Por último, se miramos a planta do edificio en Google Maps, vemos que ten forma de L. Pódese enmarcar nun rectángulo do que a casa ocupa catro sextos.
Por certo, o rectángulo vermello é un rectángulo áureo. Casualidade? Talvez...
Localización: 43° 19' 58" N - 8° 19' 03" W
Para saber máis:
Sobre vilas burguesas da comarca da Coruña: https://artnouveaucoruña.com/articulo/villas-burguesas-a-las-afueras-de-a-coruna-contexto-historico-y-seleccion/
Modernismo na Coruña e a súa área metropolitana, de José Ramón Soraluce Blond: https://ruc.udc.es/dspace/bitstream/handle/2183/17488/SoraluceBlond_JR_Modernismo_en_A-Coruna_2013.pdf?sequence=2&isAllowed=y
Sobre frisos: https://gloriablasco.wordpress.com/2009/05/12/los-frisos/
Comentarios
Publicar un comentario